Një aksident i frikshëm ka ndodhur mbrëmjen e sotme në aksin Levan – Tepelenë në vendin e quajtur “24 orarëshi”, Poçem. Si pasojë e aksidentit, kanë mbetur të lënduar shtatë persona, mes tyre një 2-vjeçar.
Sipas pamjeve të siguruara nga vendi i ngjarjes, duket se përplasje mes dy automjeteve ka qenë “kokë më kokë” dhe shumë e fortë, duke shkaktuar dëme të mëdha.
Burimet paraprake kanë pohuar se në spitalin Rajonal të Fierit janë dërguar për të marrë ndihmën mjekësore 5 persona, ndërsa dy të tjerët pritet të mbërrijnë nga momenti në moment. Gazetari Enea Verria bën me dije për BalkanWeb se një fëmijë 3-vjeçar është futur në sallën e operacionit.
Fier/Informacion paraprak
Rreth orës 19:50, në aksin rrugor “Levan-Tepelenë”, automjeti tip “Nisan” me drejtues shtetasin R. Sh., është përplasur me automjetin tip “Honday” me drejtues shtetasin S. C.
Si pasojë e përplasjes janë dëmtuar dy drejtuesit e mjeteve, 3 pasagjerët në mjetin “Nisan” (18 vjeç, 12 vjeç dhe 10 vjeç) si edhe 2 pasagjerë në automjetin tip “Honday” (9 vjeç dhe 2 vjeç), të cilët ndodhen në spital, në kujdesin e mjekëve, jashtë rrezikut për jetën.
Grupi hetimor po punon për përcaktimin e shkakut të aksidentit.
